唔知大家有冇發現，銅鑼灣o既食通天其實有幾多好野食，高爾最近就試左12樓o既鮨穴（Zushi ANA），發現原來佢有唔少幾有特色o既壽司，而刺身用料亦好上乘同新鮮。
食日本菜，當然唔少得要食鮮甜o既刺身啦！我order左一款特上刺身拼盤，拼盤內有好多款式，如三文魚、海膽、牡丹蝦之類，全部都好新鮮，特別係拖羅好肥美，入口即溶，帶子又好鮮甜，用料絶對上乘無欺場。
特色壽司夠創意
花之戀係唔少人o既至愛，呢度亦有一款以花之戀概念而成o既壽司，仲係以店名──鮨穴命名；呢款鮨穴壽司除左有基本o既三文魚之外，仲有海膽、甜蝦、吞拿魚腩、三文魚子等等，一啖就食到幾種刺身，口感勁豐富呀！
另外值得一提o既係海膽松葉蟹天婦羅，呢款可謂驚喜之作！佢係炸o既天婦羅，炸左o既松葉蟹腳，上面再加上海膽，放落口度一邊食到炸松葉蟹腳o既香口，另一邊又品嚐到海膽o既鮮甜！
抵食超值午餐
食完之後真係回味無窮，過幾日高爾又咁啱Lunch Time經過果頭，決定再戰鮨穴！原來Lunch Set都幾抵架，我叫左個雜綿魚生飯午餐，除左個魚生飯外，仲有前菜、湯同甜品，都係百幾蚊，而且D魚生刺身都Keep住咁高質素，正！
最後，仲俾高爾發現左原來平日星期一至五3pm至7pm黎食午餐o既話，係有7折架！咁抵？如果平日放假想搵好野食，可以考慮下呢度喎！
鮨穴Zushi ANA
電話：2506 1232
地址：銅鑼灣勿地臣街１號時代廣場食通天12樓1202號舖
沒有留言:
張貼留言